Doha 15

कहेउ राम बियोग तव सीता। मो कहुँ सकल भए बिपरीता।। नव तरु किसलय मनहुँ कृसानू। कालनिसा सम निसि ससि भानू।।

kaheu rāma biyoga tava sītā। mo kahum̐ sakala bhae biparītā।। nava taru kisalaya manahum̐ kṛsānū। kālanisā sama nisi sasi bhānū।।

कुबलय बिपिन कुंत बन सरिसा। बारिद तपत तेल जनु बरिसा।। जे हित रहे करत तेइ पीरा। उरग स्वास सम त्रिबिध समीरा।।

kubalaya bipina kuṃta bana sarisā। bārida tapata tela janu barisā।। je hita rahe karata tei pīrā। uraga svāsa sama tribidha samīrā।।

कहेहू तें कछु दुख घटि होई। काहि कहौं यह जान न कोई।। तत्व प्रेम कर मम अरु तोरा। जानत प्रिया एकु मनु मोरा।।

kahehū teṃ kachu dukha ghaṭi hoī। kāhi kahauṃ yaha jāna na koī।। tatva prema kara mama aru torā। jānata priyā eku manu morā।।

सो मनु सदा रहत तोहि पाहीं। जानु प्रीति रसु एतेनहि माहीं।। प्रभु संदेसु सुनत बैदेही। मगन प्रेम तन सुधि नहिं तेही।।

so manu sadā rahata tohi pāhīṃ। jānu prīti rasu etenahi māhīṃ।। prabhu saṃdesu sunata baidehī। magana prema tana sudhi nahiṃ tehī।।

कह कपि हृदयँ धीर धरु माता। सुमिरु राम सेवक सुखदाता।। उर आनहु रघुपति प्रभुताई। सुनि मम बचन तजहु कदराई।।

kaha kapi hṛdayam̐ dhīra dharu mātā। sumiru rāma sevaka sukhadātā।। ura ānahu raghupati prabhutāī। suni mama bacana tajahu kadarāī।।

निसिचर निकर पतंग सम रघुपति बान कृसानु। जननी हृदयँ धीर धरु जरे निसाचर जानु।।15।।

nisicara nikara pataṃga sama raghupati bāna kṛsānu। jananī hṛdayam̐ dhīra dharu jare nisācara jānu।।15।।